O equipo galego LUA Gaming, socio de videoxogo.gal, debutará esta semana na primeira división da Superliga LVP, a máxima categoría de League of Legends no territorio español. O club de Iago Aspas e Ana Peleteiro demostrará a súa valía fronte a equipos xa establecidos, como o Barcelona, Team Heretics, Giantx ou o Movistar Koi de Ibai. Este 22 de maio debutará inaugurando a primeira xornada contra Giantx Pride.
LUA Gaming alcanzou o ascenso a Superliga LVP tras a rotunda vitoria 3-0 contra Stormbringers do mes pasado, que os coroaba como campións do split de primavera tan só 4 meses despois de entrar á competición. O conxunto esperou ate a semana das Letras Galegas para deleitarnos co seu anuncio, que incendiou as redes coa súa mensaxe de orgullo galego con poema de Rosalía de Castro incluido.
LUA x SUPERLIGA 2024
— LUA Gaming (@LUAGaming_) May 16, 2024
Hai algo na nosa terra que sempre, sempre… nos fai ir cara adiante.
Galicia ha llegado para quedarse.#ToTheMuun | #SuperligaLoL @LVPesLoL pic.twitter.com/PFx1bnBshH
Os rivais deste mércores, Giantx Pride, xa quedaran no terceiro posto en playoffs do split pasado e conta con xogadores de talla internacional, como Juhan e Feisty. Non obstante, o equipo de LUA Gaming non lles ten nada que envidiar, especialmente con xogadores como DuaLL (Soporte) ou Sotsy (Top), que xa probaron a súa valía en Europa. Tamén contan coa incorporación de Tsiperakos (Mid) e Sn1lle (Xungla). Na posición de ADC, terán a Hazel, a nova promesa coa que conseguiron o ascenso.
O partido de LUA Gaming contra Giantx Pride terá lugar este 22 de maio ás 22:00 e será transmitido en vivo a través da canle de twitch da LVP. Tamén se enfrontará ao Barça eSports o 23 de maio ás 22:00.
